Serbska lěśojska šula

Serbska lěśojska šula

Serbska lěśojska šula jo se chopiła

cas: 04.08.2014 – 16.08.2014
městnje: Lipsk/ Budyšyn

Serbska lěśojska šula 2014 jo mjazynarodny lěśojski ferialny kurs za serbsku rěc a kulturu. Lětosny kurs se wótměwa w kooperaciji mjazy wědomnostnym dalejkubłanim Lipšćańskeje uniwersity, institutom za sorabistiku a Budyšyńskim serbskim institutom wót 4. do 16. awgusta w Lipsku a Budyšynje.

Pódla wšedneje rěcneje wucby se póbituju tśi cykluse cytanjow (wó literaturje, dialektologiji a drastwach) ako teke pśednoski k aktualnemu stawoju sorabistiskego slěźenja.

Ramikowy program dajo kursist(k)am góźbu swóje rěcne znaśa wužywaś w praksy. W drugem tyźenju se wušej togo pósrědnjaju doglědy do aktualneje situacije Serbow w rozdźělnych regionach Górneje a Dolneje Łužyce, a to z glědanim na rěc, kulturu a politiku. Program se wudopołnijo pśez nawuknjenje serbskich spiwow a rejow gromaźe ze serbskimi luźimi z Łužyce.

Kurse górno- a dolnoserbskeje rěcy se pódawaju zachopjeńkarjam ako teke pókšacanym. Zaměr jo, zachopjeńkarjam pósrědniś zasadne znaśa serbskeje rěcy a wótpowědujuce znaśa pókšacanych skšuśiś a rozšyriś. Mimo togo dej se wubuźiś sensibelnosć za mjeńšynowe pšašanja, iniciěrowaś kulturelna wuměna a daś wědomnostnje funděrowany pśeglěd pśez wšake sparty sorabistiskego slěźenja. 

Pśijěło a pśileśeło jo tych 27 lětosnych kursist(k)ow mj. dr. z Japańskeje, Taiwanskeje, Francojskeje, Rusojskeje a Wjelikobritańskeje. Lipšćański tyźeń spěchujo Nimsko-česki fond za pśichod (Deutsch-Tschechischer Zukunftsfond / Česko-německý fond budoucnosti).

--------------------------------------------------------------------------------------------

Prědny raz stej serbsku lěśojsku šulu institut za sorabistiku a decernat za wědomnostne dalejkubłanje a dalokostudium na Lipšćańskej uniwersiśe w lěśe 2013 póbitowałej. Tencas ako tyźeński intensiwy kurs górnoserbšćiny. Zakładna mysl jo była, za zajmowane luźe a wósebnje studenty drugich pśedmjatow měś certificěrowany kurs, kótaryž se kužde lěto wótměwa a na kótary móžomy se pśi planowanju spušćiś. Rownož njejo se wjele wabiło, jo se pśizjawiło 20 luźi, wuknjecych w tśich kursach, kótarež su wobźělniki wjelgin derje pósuźowali.

Serbska lěśojska šula se pśewjeźo wót 2014 w kooperaciji ze Serbskim institutom z. t. ako dwatyźeńske póbitowanje za górno- a dolnoserbšćinu na wšakorakich niwowach (zachopjeńkarje, pókšacane zachopjeńkarje, pókšacane). Zajmce maju móžnosć, w Sakskej a Bramborskej awtochtonu górno- resp. dolnoserbšćinu, kenž stej samo mjazy nimskimi slawistami jano mało znatej, nawuknuś abo swóje znaśa wóžywiś a pólěpšyś. Jo móžno, se jano za prědny, jano za drugi, abo za wobej tyźenja pśizjawiś.

ECTS-certificěrowane kurse (5 CP na tyźeń) wótměju se wót 03.08.14 - 07.08.14, prědny tyźeń na Lipšćańskej uniwersiśe, drugi tyźeń w Budyšynje; za cas w Lipsku jo śěžyšćo pósrědnjenje rěcy (5 h rěcneje wucby / źeń), cas w Budyšynje jo za wětšy źěl pósćony direktnemu kontaktoju w rěcnem teritoriumje (3 h rěcneje wucby wob źeń).

Wucba se wudopołnijo z pśednoskami. Na nejwěcej wjacorach se póbitujo kulturny program. Wó wobźělnikow se wócakujo intensiwne samostatne pśigótowanje a wóspjetowanje maśizny.

Pśizjawiś móžośo se how.


Wótběg prědnego tyźenja namakajośo how.

slědna změna: 06.08.2014