B. A. Europske mjeńšinowe rěče

B.A. Europske mjeńšinowe rěče

Mjezynarodny B. A. Europske mjeńšinowe rěče je nowy wědomostny studij.
Zakładny koncept je, zo studuja studenća dwě lěće na swojej domjacej
uniwersiće a jedne lěto na wukrajnej uniwersiće. Zakónčace wuswědčenje dóstanu
wot domjaceje uniwersity. Tuchwilu je jenička partnerska uniwersita
Szczecin.

Reagujemy z tutym nowym poskitkom na jara niske ličby studentow sorabistiki

Studij je w Lipsku do dalokeje měry identiski z "klasiskej"
sorabistiku, je pak šěršo wusměrjeny přez to, zo njeje wólbny wobłuk
swobodny, ale z druhimi mjeńšinowymi rěčemi a mjeńšinowědu
napjelnjeny. To twori wobsahowy móst k partnerskej uniwersiće a zaruči
tež w Serbach trěbne kompetency, kotrež klasiska sorabistika
njesposrědkuje. Tež wuhlady za wědomostnu karieru su lěpše, dokelž ma
absolwent

- solidne znajomosće pólšćiny (hdźež je lěto bydlił a studował)
- solidne znajomosće jendźelšćiny (wuwučowanska rěč na partnerskej
  uniwersiće)
- znajomosće znajmjeńša jedneje dalšeje mjeńšinoweje rěče

To zjednori pozdźiše dźěło w mjezynarodnych gremijach runje kaž
přirunowace interdisciplinarne a interkulturelne slědźenja, kiž su za projekty kaž WITAJ njeparujomne. Nimo toho wotpowěduja kwalifikacije lěpje dźěłowym wikam hač kwalifikacije na kóncu tradicionalneho B.A. Sorabistiki.

Studij ma dwě čarje:

Jedna čara je za studentow, kiž maja na spočatku studija znajmjeńša kwalifikaciju B1 w hornjo- abo delnjoserbšćinje po zhromadnym europskim ramiku, tak zo nimaja ćeže, serbskorěčne zarjadowanja sćěhować a so serbsce wo fachowych temach wuprajeć.

Druha čara je za ludźi, kiž nimaja wotpowědne rěčne znajomosće; woni započinaja najprjedy z importowanymi (= němskorěčnymi) zarjadowanjemi a maja składnosć, so najprjedy w serbšćinje tak wukmanić, zo móža so potom połnohódnje na serbskorěčnych zarjadowanjach wobdźělić.

We woběmaj padomaj wočakujemy wot našich studentow, zo swoje kónčne dźěło znajmjeńša zdźěla w dobrej serbšćinje napišu.

Aktualny pruwowanski porjad inkl. plan studijneho wotběha namakaće tu.

B. A. Mjeńšinowe rěče zwisuje ze stawiznami města Lipska, kotrež wot irskeho misionowanja profitowaše. Město běše tež kulturelny centrum Serbow hač do 20. lětstotka. Nimo toho běše Lipsk město intensiwnych keltologiskich slědźenjow.

poslednja změna: 04.04.2017