Na instituće za sorabistiku poskićamy dwě bachelorskej a dwě masterskej studijnej předmjetaj kaž tež wukubłanje za wučerstwo serbšćiny na zakładnych šulach, wyšich šulach a gymnazijach.

Studijne předmjety

Ze załoženjom Instituta za sorabistiku w lěće 1951 dóstachu Serbja jako ludowa mjeńšina w Němskej k prěnjemu razej w stawiznach swójsku wysokošulsku instituciju. To zmóžni na jednej stronje systematiske slědźenja na polu rěčespyta, w literaturowědźe a stawiznach Łužiskich Serbow a na druhej stronje wukubłanje serbskich wučerjow, rěčespytnikow, literaturo- a kulturowědnikow kaž tež žurnalistow. Spočatnje steješe wězo kwalifikowanje pedagogow a fachoweho personala za serbske institucje w srjedźišću. Přez rosćacy wuznam a připóznaće mjeńšinow a małych narodow w europsklim konteksće, powjetši so tež paleta móžnych powołanskich profilow. Rěčne kubłanje studentow w našim instituće přewjedźe so jeničce w hornjo- a/abo delnjoserbšćinje.

B. A. Sorabistika je třilětny zakładny wědomostny studij serbskeje rěče a kultury. Ze zakónčenjom bachelora je móžno, do powołanskeho žiwjenja zastupić abo w běhu dweju lětow stopjeń mastera (M. A.) docpěć. Połojca bacheloroweho studija wobsteji z jadroweho předmjeta, tamna połojca su tak mjenowany wólbny wobłuk a klučowej kwalifikaciji.
B. A. Sorabistika ma dwě čarje:

  • Jedna čara je za studentow, kiž maja na spočatku studija znajmjeńša kwalifikaciju B1 w hornjo- abo delnjoserbšćinje po zhromadnym europskim referencnym ramiku, tak zo nimaja ćeže, serbske zarjadowanja sćěhować a so serbsce k fachowym temam wuprajić.
  • Druha čara je za přidružnikow a ludźi, kiž nimaja wotpowědne rěčne znajomosće; woni započinaja najprjedy z němskorěčnymi zarjadowanjemi a maja składnosć, so najprjedy w serbšćinje tak wukmanić, zo móža so potom połnohódnje na serbskorěčnych zarjadowanjach wobdźělić.

We woběmaj padomaj wočakujemy wot našich studentow, zo swoje kónčne dźěło w dobrej serbšćinje napišu.

M. A. Sorabistika je dalše za powołanje kwalifikowace wysokošulske zakónčenje. Dwulětny masterowy studij předwidźi pohłubšenje jadroweho abo interdisciplinarneho studijneho poskitka, wón so pak sylnišo na praktiske nałožowanje, pak sylnišo na wědomostne slědźenje orientuje. Přistupne wuměnjenje je wotzamknjeny bachelorowy studij.

Formular k přizjewjenju masterskeho dźěła.

Master delnjoserbšćiny je dalekubłacy studij za braniborskich wučerjow, kiž chcedźa so na wučerjow serbšćiny dokubłać.
Pruwowanje kmanosće je obligatoriske. Studij so wotzamknje z masterskim dźěłom.

Zakładny koncept je, zo studuja studenća dwě lěće na swojej domjacej uniwersiće a jedne lěto na wukrajnej uniwersiće. Zakónčace wuswědčenje dóstanu wot domjaceje uniwersity. Tuchwilu je jenička partnerska uniwersita Szczecin.
Studij je w Lipsku do dalokeje měry identiski z „klasiskej“ sorabistiku, je pak šěršo wusměrjeny přez to, zo njeje wólbny wobłuk cyle swobodny, ale z druhimi mjeńšinowymi rěčemi a mjeńšinowědu napjelnjeny. To twori wobsahowy móst k partnerskej uniwersiće a zaruči tež w Serbach trěbne kompetency, kotrež klasiska sorabistika njesposrědkuje. Tež wuhlady za wědomostnu karieru su lěpše, dokelž ma absolwent:

  • solidne znajomosće pólšćiny (hdźež je lěto bydlił a studował),
  • solidne znajomosće jendźelšćiny (wuwučowanskeje rěče na partnerskej uniwersiće) kaž tež
  • znajomosće znajmjeńša jedneje dalšeje mjeńšinoweje rěče.

Studij ma dwě čarje:

  • Jedna čara je za studentow, kiž maja na spočatku studija znajmjeńša kwalifikaciju B1 w hornjo- abo delnjoserbšćinje po zhromadnym europskim ramiku, tak zo nimaja ćeže, serbskorěčne zarjadowanja sćěhować a so serbsce k fachowym temam wuprajić.
  • Druha čara je za ludźi, kiž nimaja wotpowědne rěčne znajomosće; woni započinaja najprjedy z němskorěčnymi zarjadowanjemi a maja składnosć, so najprjedy w serbšćinje tak wukmanić, zo móža so potom połnohódnje na serbskorěčnych zarjadowanjach wobdźělić.

We woběmaj padomaj wočakujemy wot našich studentow, zo swoje kónčne dźěło znajmjeńša zdźěla w dobrej serbšćinje napišu.

Tutón studijny směr je w poslednjej fazy planowanja.

Statny eksamen je zakónčenje wučerskeho studija. Wučerski studij serbšćiny přihotuje studowacych na powołanske dźěło w serbskich a dwurěčnych šulach w Hornjej a Delnjej Łužicy a posrědkuje jim trěbne fachowe znajomosće, kmanosće a metody, zo zamóža we wědomostnym a didaktiskim wobdźěłanju wučbneje maćizny samostatnje myslić a zamołwiće jednać. Předewšěm dyrbja kmani być, w hornjo- a/abo delnjoserbskej rěči ertnje kaž tež pisomnje wo rěčewědnych, literarnych a kulturowědnych temach a wyše toho wo prašenjach z druhich předmjetow kaž tež ze wšědneho žiwjenja na přiměrjene a kwalifikowane wašnje komunikować. Dale maja jako kompetentni rěčni poradźowarjo hajenje a zdźerženje serbšćiny w swojej wokolinje spěchować a podpěrać.

Dołhosć studija wotwisuje wot šulskeje družiny:

  • Wučerjo zakładneje šule studuja wosom,
  • wučerjo wyšeje šule dźewjeć a
  • gymnazialni wučerjo dźesać semestrow.
  • Wučerjow spěchowanskeje šule njewukubłamy.

To móže Was tež zajimować

Hornjoserbšćina za ludźi bjez znajomosće serbšćiny

wjace zhonić

Wučbne zarjadowanja

wjace zhonić

Studijne poradźowanje

wjace zhonić